Катонқарағайда бірнеше үй орталық жылу жүйесіне қосылады
Шығыс Қазақстан облысының әкімі Ермек Көшербаев іссапармен Катонқарағай ауданында болып, бірқатар әлеуметтік нысандарды аралап, жүргізіліп жатқан жұмыс барысымен танысып қайтты.
Өңір басшысы ең алдымен жаңадан салынып жатқан орталық қазандықтың құрылыс алаңында болып, ондағы жұмыс барысымен танысты.
Сондай-ақ, облыс әкіміне аудан орталығында тартылып жатқан су құбыры құрылысының барысын да баяндады. Бас мердігердің айтуынша, жобаға сәйкес ұзындығы 69 шақырым құбыр жүргізіледі.
- Сәулет, қала құрылысымен шұғылданатын қызметкерлер профицит, дефицит жағынан су, электр қуаты, жылуымен қамтуды зерттеп, есеп жүргізуі қажет. Оны, яғни, орындаған жұмыстарыңызды нысанды жасаған соң, облыс әкімдігінде келіп бекітіп-қорғайсыздар. Соған сәйкес қаражат көлемі бөлінеді, - деп атап өтті аймақ басшысы.
Аудан әкімінің міндетін атқарушы Расул Қарабалинов іске қосылатын жаңа жылу жүйесіне елді мекендегі әкімшілік ғимараттар, әлеуметтік нысандар және 4 тұрғын үй қосылатындығын жеткізді. Орталық қазандықтың ескі ғимараты алдағы уақытта қазандық техникаларына арналған орын мен көмір қоймасы ретінде пайдаланылатын болады.
ШҚО әкімінің баспасөз қызметі
