Өскеменнің жаңа жылу электр орталығы Қасым Қайсенов кентіне салынуы мүмкін

Сурет: Altainews.kz

22 мамырда Өскеменде жаңа жылу электр орталығын салу жөніндегі жұмыс тобының бірінші отырысы өтті, деп хабарлайды Altainews.kz. тілшісі.

Кеңеске "Самұрық-Энерго" ұлттық компаниясы мен ресейлік "ИНТЕР РАО-Экспорт" компаниясының, өңірдің энергетикалық кәсіпорындарының, сондай-ақ Өскемен жылу желісі мекемесінің өкілдері қатысты.

Кеңесте болашақ нысан құрылысының орналасуы және оның техникалық-экономикалық жағдайлары мәселелері қаралды.

- Өскемен қаласының 2021 жылғы бас жоспарына сәйкес, Қасым Қайсенов кентінің аумағында жылу электр орталығы салынады. Бүгінгі жұмыс тобының отырысы барысында құрылысқа жоспарланған жер учаскесінің экологиялық талаптарға және техникалық-экономикалық жағдайларға сәйкестігі мәселесі қаралатын болады. Барлық талаптарға сай болған жағдайда жобалық-сметалық құжаттаманы әзірлеп, құрылыстың басталу мерзімін анықтайды,-деді ШҚО энергетика және тұрғын үй-коммуналдық шаруашылық басқармасының басшысы Нұрлан Рамазанов.

Сондай-ақ, оның айтуынша, "Самұрық-Энерго" Ұлттық компаниясының өкілдері ресейлік "Интер-РАО-Экспорт" компаниясымен бірлесіп техникалық-экономикалық негіздеме әзірлейді.

- Біз өз тарапымыздан ЖЭО - ның қажетті қуатын анықтадық - бұл 1232 ггкал / сағ.ол Өскемен қаласының 2040 жылға дейінгі даму стратегиясымен айқындалған, - деп түсіндірді Нұрлан Рамазанов. 

Естеріңізге сала кетейік, осы жылдың сәуір айында Қазақстан мен Ресей көмір ЖЭО салу туралы үкіметаралық келісімге қол қойды. Жоспарға сәйкес Көкшетау, Семей және Өскеменде жаңа жылу электр орталықтары пайда болады. Жаңа ЖЭО құрылысымен ресейлік "Интер РАО-Экспорт"компаниясы айналысады.

Тәуелсіз эколог Роман Честных Өскеменде жаңа жылу электр орталығын салу үшін ескі жылу электр орталығын істен шығару керек дейді. Оның айтуынша, екі ЖЭС қатар жұмыс істеуі қаланың экологиясына кері әсер етеді. Ал эколог Дәулет Асанов газ тарту жобасын іске асыру керек дегенді айтады.

ШҚО экология департаментінің ақпараты бойынша, Өскеменнің қолданыстағы жылу электр орталығы қаланы ластаушы ең ірі екі кәсіпорынның қатарында.

Қазақстан билігі Солтүстік пен Шығыс аймақтарды газдандыру жоспары барын көп жылдан бері айтып келеді. Бірақ бұл жоспар әлі орындалған жоқ.