"Үздік педагог" байқауы басталды: жүлде қоры 3,6 млн теңге

Білім күні қарсаңында елімізде "Үздік педагог" байқауы басталды, деп хабарлады Оқу-ағарту министрлігі.

Байқауға мектепке дейінгі, орта, техникалық және кәсіптік білім беру ұйымдарының педагогтары қатыса алады. Жеңімпаздарға 3 миллион 692 мың теңге көлемінде сыйақы беріледі. 

Байқау үш кезеңнен тұрады: 

- I кезең – аудандық, қалалық деңгей (8 – 21 тамыз);

- II кезең – облыстық деңгей (22 тамыз – 10 қыркүйек);

- III кезең – республикалық деңгей (11 қыркүйек – 18 қазан).

Алғашқы екі кезеңнің қорытындысы бойынша ең жоғары ұпай жинаған мұғалімдер республикалық деңгейге өтеді.

Байқауға қатысуға өтінімдер uzdikustaz-nobd.edu.kz веб-порталында қабылданады.

– "Үздік педагог" Республикалық конкурсы 2012 жылдан бері өткізіліп келе жатқан дәстүрлі байқау. Сондықтан маңызы зор. Осы уақытқа дейін 700-ге жуық жүзден жүйрік, мыңнан тұлпар атанған мықтылар анықталды. "Үздік педагог" атағына білім беру ұйымдарында жұмыс істейтін және құжаттарды тапсыру кезінде кемінде бес жыл үздіксіз педагогикалық өтілі бар педагогтер үміткер бола алады. Бұл - балабақша, мектеп, колледж мұғалімдері. Байқау аясында мұғалімнің білім саласын дамытуға қосқан үлесі, ұстаз қызметінің тиімділігі мен оның кәсіби шеберлігі ескеріледі, - деді ҚР Оқу-ағарту министрлігі Орта білім беру комитетінің төрағасы Қаныбек Жұмашев.

"Үздік педагог" атағының иегерлеріне 1000 АЕК көлеміндегі ақшалай сыйақы ғана емес, төсбелгілер де беріледі.