Күршімде облыстық және аудандық маңызы бар жолдар жөнделіп жатыр

ЖАҢАЛЫҚТАР / АУДАНДАР Бүгін, 11:01 0

Ағымдағы жылы Күршім ауданында жалпы сомасы 1,9 млрд. теңгеге 40,4 шақырым жол (облыстық – 15 шақырым, аудандық – 12 шақырым, көшелер – 13,4 шақырым) жөнделді. Бұл туралы Күршім ауданы әкімінің орынбасары Мейіржан Әлібеков Орталық коммуникациялар қызметі алаңында өткен баспасөз брифингінде айтты, деп хабарлайды Bizdiң Өskemen тілшісі.
Естеріңізге сала кетейік, 2024 жыл Шығыс Қазақстанда «Жол жылы» болып жарияланған болатын. Күршімде «Жол жылында» атқарылған жұмыстар аз емес. Атап айтқанда, облыстық маңызы бар «Күршім-Қалжыр-Бурабай» автожолының 15 шақырымына орташа жөндеу жүргізілген.

- Аудандық маңызы бар «Күршім-Алғабас» (2 шақырым), «Маралды-Үшбұлақ» (2 шақырым), «Күршім-Қалжыр-Ақши» (8 шақырым) автожолдарына ағымдағы жөндеу жұмыстарын жүргіздік. Қазір «Күршім-Алғабас» автожолына 550 метр дренаж салу үшін траншея қазу бойынша жұмыстар жүргізіліп жатыр, - деді Мейіржан Қанатбекұлы.

Елді мекен көшелері де биыл назардан тыс қалған жоқ. Мәселен, Маралды ауылішілік 6,9 шақырым жолға асфальт төселді. Сондай-ақ Құйған (3,8 шақырым), Алғабас (2,0) және Күршім ауылының Достық (0,4), Аңғышпаев (0,4) көшелерінің жолы орташа жөндеуден өткізілген.

- «Ауыл - ел бесігі» жобасы аясында Ақши (0,7 шақырым), Қаратоғай (0,9 шақырым) ауылдарындағы көшелеріне орташа жөндеу жүргіздік. Маралды ауылының Жағалау, Уалиханов көшелеріне, Қыстау-Күршім ауылының Орталық көшесіне қиыршық тастар төгіліп, тегістелді. Үшбұлақ-Маралды аудандық маңызы бар автомобиль жолының «Самсып» учаскесінде жол жөнделді. Маралды -Үшбұлақ автожолына қиыршық тас төгіліп, ағымдағы жөндеу жұмыстары жүргізілді,- дейді аудан әкімінің орынбасары Мейіржан Әлібеков.