Өскеменде Зайсан ауданының мәдени күндері өтеді

Өскемен қаласында 29 және 30 қараша күндері «Заңғар Зайсан шақырады!» атты Зайсан ауданының мәдени күндері өтеді.

29-30 қараша күндері облыс орталығында түрлі мәдени және спорттық шаралар жоспарланып отыр. 

29 қараша сағат  10:00-11:00 аралығында «Жұмысшы мамандықтары жылына» орай Шығыс Қазақстан көпсалалы колледжі және «Зайсан» технология колледжі арасында кәсіптік маман даярлау бағытында шеберлік сағаты өтеді. 

29 қараша күні сағат 10:00-де  КСРО халық мұғалімі Құмаш Нұрғалиевтің 100 жылдығына орай Қ.Нұрғалиев атындағы заң колледжінде зайсандық әуесқой ақын, сазгер Мәрияш Блеушованың студенттер арасында мәдени-рухани кеші өтеді. 

29 қараша 10:00-11:00 аралығында «Дарабоз» спорт клубында дзюдодан зайсандық спортшылармен шеберлік сағаты, сағат 18:00-де «Шығыс Қазақстан облыстық филармония» көрермендер залында зайсандық өнерпаздардың қатысуымен гала-концерт ұйымдастырылады. Сондай-ақ ауылшаруашылық және өнеркәсіп өнімдерінің, қолөнер шеберлерінің, суретшілердің көрмесі өтеді. 

30 қараша сағат 09:00-16:00 аралығында «Алтай» көтерме-тарату орталығында Зайсан ауданының ауылшаруашылық жәрмеңкесі мен көркемөнерпаздардың концерті, ұлттық спорт түрлерінен сайыстар ұйымдастырылмақ.