ШҚО-да тауарлардың қымбаттау көрсеткіші республиканың орташа деңгейінен жоғары

Шығыс Қазақстан облысының экономика және бюджеттік жоспарлау басқармасының мәліметінше, 2024 жылдың бірінші тоқсанында орташа айлық жалақы – 376,4 мың теңгені, ал  республика бойынша осы кезеңдегі орташа жалақы айына –  382,3 мың теңгені құрады.  

Экономикалық басқарманың есебіне сәйкес, 2024 жылдың қаңтар-наурыз айларында ШҚО-да жалақы өсімі – 114,6%-ды, республика бойынша орташа жалақының өсімі – 112,3%-ды құрайды. 

Тұтыну бағасының индексі маусымда өткен жылдың желтоқсан айымен салыстырғанда 104,6%-ды құрады. Республикада бұл өсім біршама төмен – 103,9%. Халыққа қызмет көрсету бағасы облыс бойынша – 108,1%-ға өсті. Атап айтқанда, электр энергиясы, амбулаториялық-емханалық қызмет көрсету, жеке автокөліктерге техникалық қызмет көрсету және жөндеу, автокөлікті сақтандыру, шаштараз қызметтері, демалыс пен ойын-сауық, көлік қызметтерінің бағалары біршама өсті.  

Азық-түлік тауарлары тобы бойынша баға индексі – 102,7 %-ды құрады. Әсіресе, жемістер мен көкөністер – 111, балық және теңіз өнімдері – 107,1, қант пен тәттілер – 105,3, макарон өнімдері – 103,4, ет – 102,4 %-ға қымбаттады. 

Азық-түліктен бөлек, киім-кешек, дәрі-дәрмек, аяқ киім т.б. заттардың республика деңгейдегі орташа бағалары – 103,5 %-ды құраса, Шығыс Қазақстан облысында бұл деңгей – 104,1 %-ды құрайды. 

Өңірдегі баға мен жалақының өсуі туралы мәліметтер ШҚО әкімдігінде өткен жиында белгілі болды.