ШҚО-да жас сарбаздар әскери ант қабылдады

Серебрянск қаласындағы 97638 әскери бөлімінде еліміздің түкпір-түкпірінен жиналған 90-ға жуық жас сарбаз Қазақстанның тұтастығы мен бейбіт өмірін қорғауға салтанатты түрде әскери ант берді, деп хабарлайды Bizdiң Өskemen тілшісі Өскемен гарнизонының баспасөз қызметіне сілтеме жасап.

– Ұлымның әскери ант қабылдау сәтін көру мен үшін үлкен мәртебе. Бір ай бұрын әскерге бозбала болып аттанған еді, бүгінде Отан қорғаушы ретінде қарсы алдымда тұр. Оның бойынан сенімділік пен ерік-жігерді көріп, жүрегім қуанышқа толды, – деді сарбаздың анасы Зейнап Мұратқызы.

Жас жауынгерлерге артылған міндет пен жауапкершілік – Отанға адал қызмет ету. 

– Бүгін мен үшін ұмытылмас күн. Біз ел алдында емес, жүрегіміздің алдында ант бердік. Бұл тек сөз емес, болашақтағы әр ісімізге жауапкершілік артатын уәде. Мен өз борышымды адал өтеуге уәде беремін, – дейді жас сарбаз Санжар Бүркітбай. 

Салтанатты шараға келген ата-аналар бір ай ішінде темірдей тәртіпке үйренген жас сарбаздардың әскери ант қабылдау рәсіміне куә болды, ал салтанатты жиынға келе алмағандар сарбаздармен онлайн байланысқа шығып, жүрекжарды тілектерін жолдады.