Гематология орталығының құрылысы қашан аяқталады? – ШҚО

Өскеменде бес жыл бұрын басталған гематология орталығының құрылысы әлі аяқталған жоқ. Қала әкімдігі  құрылыс жұмыстары аяқталатын мерзімді атады, деп хабарлайды Bizdiң Өskemen.

Шығыс Қазақстан облысы орталығында салынып жатқан заманауи Гематология орталығының құрылысында 60 адам жұмыс істеп жатыр. Қазіргі таңда нысанның 80 пайыз жұмысы аяқталған.

– Бүгінде нысанның дайындық деңгейі 80 пайызды құрайды. Негізгі корпуста есік орнату, полиуретанды еден төсеу, әлсіз ток желілерін, жылу және желдету жүйелерін орнату жұмыстары жүргізілуде. Алдағы уақытта төбелерді монтаждау, қабырғаларды сырлау және қорғаныш қабатын жағу жұмыстары басталады. Құрылыс алаңында 60 маман еңбек етуде. Гематология орталығының құрылысы 2025 жылдың желтоқсан айында аяқталады деп жоспарлануда, – деп мәлімдеді Өскемен қаласының әкімдігі. 

Қазір пациенттер мен олардың жақындарына арналған пансионат корпусы толық бой көтерген. 20 сәуірден бастап ішкі әрлеу жұмыстары жүргізіліп, нысанды жиһазбен және медициналық жабдықтармен қамтамасыз етуге дайындық басталмақ.