Самар ауданы ауылдық инфрақұрылым мен экономиканы белсенді дамытуда

Биыл Самар ауданы әлеуметтік-экономикалық даму бағытында айтарлықтай жетістіктерге жетті. Жылдың алғашқы он айында құрылыс, ауыл шаруашылығы және кәсіпкерлік салаларында оң динамика байқалды. Бұл туралы Өңірлік коммуникациялар қызметі алаңында ШҚО Самар ауданы әкімінің орынбасары Қайдар Сұрашев мәлімдеді. 

Ауданның ең үлкен жетістіктерінің бірі –  құрылыс көлемінің артуы. Жалпы көлемі 4,4 миллиард теңгеге жетіп, өткен жылмен салыстырғанда үш есеге өскен. Ауыл шаруашылығында да өсім тіркелді: өнім көлемі 10,5%-ға артты, ал аудан аумағында ауыл шаруашылығы техникаларының саны 1446 бірлікті құрады. Сонымен қатар, биыл 42 жаңа техника сатып алынған.

Туризм саласында да даму байқалады. Бұқтырма су қоймасы ШҚО-дағы ең танымал демалыс аймақтарының біріне айналып, жыл сайын 55 мыңнан астам туристті қабылдауда. Демалушыларға қолайлы жағдай жасау үшін жағалауда жаңа инфрақұрылым мен нысандар салу жоспарланып отыр.

Бұдан бөлек, аудан тұрғындарын сапалы ауыз сумен және электр энергиясымен қамтамасыз ету жұмыстары жалғасуда. 2024 жылы жолдарды жөндеуге 1,3 миллиард теңгеден астам қаржы бөлініп, 29 шақырым жол жөнделді. Бұл көлік қатынасын жақсартуға мүмкіндік берді.

Бұл шаралардың барлығы жергілікті тұрғындардың өмір сүру сапасын жақсартуға және ауданның даму деңгейін көтеруге бағытталған.