«25 мың тұрғынға бір бригада» қалай үлгереді?

Бірінші мамырдан бастап жедел жәрдем қызметі мен мобильді бригадалар екіге бөлініп жұмыс істейді. Бұл туралы Денсаулық сақтау министрі Ақмарал Әлназарова Үкімет отырысында айтты.

Бастапқыда мобильді бригадалар «35 мың тұрғынға 1 топ» қағидатымен жасақталған. Кейін 1 мамырдан бастап бұл норма 25 мың тұрғынға дейін азаятыны айтылды. Яғни 20 млн халыққа кемінде 800 мобильдік бригада қажет деген сөз. 

– 1 мамырдан бастап емханалардың жанындағы 600 мобильдік бригада жұмысқа кірісуге дайын тұр. Қалған 200 бригада аутсорсинг аясындағы келісімшарт бойынша жұмысқа кіріседі. Олармен тиісті келісімшарттар бекітілген, –  деп түсіндірді министр Үкімет отырысынан кейінгі баспасөз мәслихатында.

Қазақпарат тілшісі «25 мың тұрғынға бір бригада» халқы сирек қоныстанған аудандарда қалай ұйымдастырылатынын сұрады. 

– Мысалы, Шығыс Қазақстанның Катонқарағай ауданында 23 мыңнан асатын тұрғын бар. 27 елді мекенге бір бригада қалай үлгереді – деді БАҚ өкілі.

Ведомство басшысы мұндай аудандардың мәселесін аутсорсинг құралы арқылы шешу көзделіп отырғанын айтты. 

– Ауылдық елді мекендерде жедел жәрдем қызметімен бірге аутсорсинг бригадалары бұрынғыдай жұмыс істей береді. Осы жұмыс бір жолға қойылғаннан кейін басқа да қосымша өзгерістерді қарастырамыз, - деді Ақмарал Әлназарова.