ШҚО-да аязды күндері оқушылар сабақ оқи ма?

«Температуралық режим, қысқы мезгілде сабақ өткізуді ұйымдастыру туралы»  ШҚО білім басқармасының бұйрығы шықты. 

Облыстық білім басқармасына қарасты мектепке дейінгі және жалпы орта білім беру бөлімінің басшысы Бұлбұл Қозыбаева ауа райының құбылуына қарай болатын өзгерістер туралы мәлімдеді.  

Бұлбұл Қозыбаеваның сөзінше, егер жел кемі 2 м/с жылдамдықпен соқса, төмендегі сыныптар мектепке бармайды: 

-23℃ және одан төмен болса – 1-4 сыныптар;
-27℃ және одан төмен болса – 5-9 сыныптар;
-29℃ және одан төмен болса – 10-11 сыныптар және I-II курстарда оқитын колледж студенттері.

– Сабақтың болатыны, я болмайтыны туралы ақпарат таңертең сағат 6:00-7:00 аралығында білім басқармасындағы жауапты адамдарға жетеді. Бұл бірінші ауысымдағы балалар үшін. Ал екінші ауысымдағылар 10:30-12:00 аралығында ақпараттан хабардар болады, - деді Бұлбұл Қозыбаева. 

Сабақ болмайтыны туралы ақпараттар облыстық білім басқармасы мен білім беру ұйымдарының әлеуметтік желідегі парақшасында жарияланады. 

– Шығарылған шешім өңірлердегі уақыт белдеуінің өзгеруіне қарамастан, қайта түзетілмейді. Екінші ауысымдағы балалар үшін күн суытып кеткенде сабақ қысқарады, - дейді Бұлбұл Жомартқызы.