Денсаулық министрі Риддер қаласына не үшін барды?

28 тамыз күні Шығыс Қазақстан облысына жұмыс сапарымен келген денсаулық сақтау министрі Ақмарал Әлназарова Шығыс Қазақстан облысының халқымен Риддер қаласында кездесу өткізді. 

Кездесу барысында денсаулық сақтау министрі өңір тұрғындарының сұрақтарына жауап берді. 

Елена Гузеева, қала тұрғыны: 
– Медициналық қызметтердің қолжетімділігі туралы сұрағым келеді. Мысалы, қазір медициналық сақтандыру жүйесімен қамтылмаған науқастар онкологиялық ауруларға скринингтен өте алмайды. Бұл мәселе Риддер қаласында және жалпы Қазақстан бойынша қалай шешіліп жатыр?   
Ақмарал Әлназарова, Денсаулық сақтау министрі: 
– Шынында да, бұл сұрақ өте өзекті. Бүгінде Қазақстан халқының 83 %-ы міндетті әлеуметтік медициналық сақтандыру жүйесінде тіркелген. Ал 17 %-ға жуығы міндетті әлеуметтік медициналық сақтандыру жүйесіне тіркелмеген. Әрине, бүгінде денсаулық сақтау жүйесінің сапасы, қолжетімділігі және міндетті әлеуметтік медициналық сақтандыру жүйесінің өзіне қатысты сұрақтар туындауда. Сондықтан онкологиялық скринингтердің қолжетімділігіне қатысты мәселелер бар. Бүгінде бізде ересек тұрғындарға арналған алты негізгі скрининг бар. Бүгін біз тиісті есептеулерді жүргіздік. Бұл заңнамаға өзгерістер енгізуді талап етеді. Біз қазір ережелерге сәйкес келетін кодекс дайындадық. Cүт безі обырын, жатыр мойны обырын скринингтік тексеру саласында қолжетімді ету және сақтандыруы жоқ халық үшін қолжетімді ету мақсатында шамамен 17 млрд теңге бөлінді.                 

Тұрғындармен кездесуден кейін денсаулық сақтау министрі Риддер қаласында бір аусымда 500 адамға қызмет көрсететін емханамен және 200 орындық стационары бар көпбейінді аурухана кешенінің құрылыс жұмыстарымен танысты. 

– Биыл барлығы 556 нысанды салып, пайдалануға беруіміз керек. Бұлардың барлығы ауылдағы нысандар. Шығыс Қазақстан облысында 38 нысан салынатын болады. Өткен жылы 36 нысанның 18-і салынды. Биыл Шығыс Қазақстан облысында 18 алғашқы медициналық-санитарлық көмек көрсету нысанының құрылысы жалғасып жатыр. Қазір Риддер қаласындағы көпбейінді аурухананың құрылыс алаңындамыз. Бұл нысанның құрылысы екі-үш жыл бұрын басталды. Бірақ бүгінде республикалық бюджетті қоса алғанда, қаржыландыруға қатысты мәселелер бар. Қазір бас мердігермен құрылыс жұмыстары жайлы ақылдастық. Біз өз тарапымыздан қаржыландыру мәселелерін,  қыркүйек пен қазан айларында тағы бір траншпен құрылысты тоқтатпай қаржы мәселесін шешуге тырысамыз, - деді денсаулық сақтау министрі Ақмарал Әлназарова.