Алтай қаласында «Жас сақшы» сыныбы ашылды
Республика күні қарсаңында Алтай қаласындағы № 9 орта мектепте қызметтік міндетін атқару кезінде қаза тапқан аға лейтенант Александр Сидоровтың есімі берілген «Жас сақшы» сыныбының салтанатты ашылу рәсімі өтті, деп хабарлайды Bizdiң Өskemen.
Іс-шара барысында 7 «Б» сыныбының 17 оқушысы ант қабылдап, тәртіпті сақтауға, айналасындағылардың құқықтарын құрметтеуге және өз әрекеттеріне жауапкершілікпен қарауға дайын екендерін білдірді.
ШҚО Полиция департаментінің мәліметінше, бұл сынып балаларға жаңа білім беріп қана қоймай, заңның мәнін тереңірек түсінуге және қоғам алдындағы жеке жауапкершілігін сезінуге мүмкіндік береді.
Бағдарлама аясында оқушылар Қазақстан Республикасының заңнамасын зерделеп, құқықтық сабақтарға, полиция қызметкерлерімен кездесулерге және қоғамдық маңызы бар іс-шараларға қатысады. Кәмелетке толмағандар арасындағы құқық бұзушылықтардың алдын алуға, құқықтық мәдениетті қалыптастыруға, рухани-адамгершілік тәрбие мен отансүйгіштікке баулуға ерекше көңіл бөлінеді.
– Аға лейтенант Александр Сидоровтың есімі оқушылар үшін ерліктің, борышқа адалдықтың және адамдарға жанқиярлықпен қызмет етудің үлгісіне айналады. Осындай тағылымды мысалдар жас ұрпаққа Отанға деген сүйіспеншіліктің сөзбен ғана емес, нақты іспен, әділдікті қорғауға және қоғамға пайда келтіруге дайын болумен өлшенетінін ұғынуға көмектеседі. Жаңа «Жас сақшы» сыныбы «Заң мен тәртіп» жобасы және «Адал азамат» бірыңғай тәрбие бағдарламасы аясында ашылды. Бүгінде Шығыс Қазақстан облысында осындай 25 сынып жұмыс істейді. Онда 500-ге жуық оқушы білім алады, – деп хабарлады облыстық полиция департаменті.
