Еліміздің барлық өңірінде Балаларды қорғау күніне арналған ауқымды шаралар басталды. Биылғы жылы бұл мереке «Қазақстан балалары» атты бірыңғай ұранмен ұйымдастырылуда. Облыс орталығы Өскеменде де іс-шаралар легі басталып кетті, деп хабарлайды Bizdiң Өskemen.
22-30 мамыр аралығында Қазақстанның барлық өңірінде Халықаралық балаларды қорғау күніне арналған ауқымды іс-шаралар өтуде.
– Басты мақсат – балаларды елдің мәдени, білім беру және қоғамдық өміріне кеңінен тарту, олар үшін мүмкіндіктерге, қуанышқа және өзін-өзі дамытуға жол ашатын орта қалыптастыру. Балалар театрларды, мұражайларды, саябақтар мен кинотеатрларды тегін немесе жеңілдетілген бағамен тамашалай алады. Сондай-ақ шығармашылыққа ерекше көңіл бөлініп, өңірлерде фестивальдер, шеберлік сағаттары, интерактивті аймақтар мен отбасылық мерекелер ұйымдастырылуда, – деп хабарлады Өскемен әкімдігі.
Бұдан бөлек, бұл акция аясында ерекше қамқорлықты қажет ететін балаларды қолдауға бағытталған аймақтық қайырымдылық шаралары да өткізіліп жатыр.
Сонымен Өскемен қаласында:
– 24 мамыр күні №24 мектеп жанында «Балалық шақ – ғажайып ел» мерекелік концерті және Оқушылар шығармашылық сарайында «Біз біргеміз» отбасылық фестивалі;
– 27 мамыр күні №7 мектепте «Балалық шақтың ғажайып елі» театрландырылған ойын бағдарламасы;
– 28 мамыр күні №1Балалар музыка мектебінде «Children! Creativity! Summer!» би батылы және «Жұлдыз» балалар өнер мектебі мен Тілдерді қайта жаңғырту мектебінде «Балалық планетасы» атты асфальтқа сурет салу байқауы;
– 31 мамыр және 1 маусым күндері Үлбі өзенінің аңғарында Балаларды қорғау күніне арналған дәстүрлі патриоттық ойындар;
– 1 маусым күні Республика алаңында және Сол жағалаудағы этнопаркте 10:00 – 13:00 аралығында «»Қазақстан балалары» мерекелік концерті мен ойын алаңдары ұйымдастырылады;
– 1 маусым күні этнопаркте «шеберліктің шегі жоқ» алаңы;
– 1маусым күні сағат 12:00 де қаланың барлық шағын аудандары мен балалар жасөспірімдер клубтарында «Әлем балалар көзімен» және Сол жағалау кешенінде «PlayArena» ойын алаңы ұйымдастырылады.