Риддерде де жұмыс уақыты өзгерді

Риддер қаласында мемлекеттік мекемелер, кәсіпорындар және әлеуметтік  мекемелердің қызметкерлері жұмысты енді 08:00-де бастайды, деп хабарлайды Bizdiң Өskemen.

Жұмыс уақыты 17:30-ға дейін, ал түскі үзіліс 12:00-ден 13:30-ға дейін деп белгіленді.

Жергілікті тұрғындардың пікірінше, жаңа жұмыс кестесі ыңғайлы әрі тиімді.

«Бұл – дұрыс және уақтылы шешім. Біріншіден, қауіпсіздік тұрғысынан алғанда таңертең қараңғыда жұмысқа бару қажет емес. Екіншіден, таңғы уақытта өнімділік жоғары, жұмыс істеу жеңілірек әрі жылдамырақ», – дейді қала тұрғыны Ляззат Шаяхметова.

Риддер қаласы әкімінің орынбасары Болат Акужанов жаңа жұмыс кестесіне ауысу мәселесі тұрғындармен бірге талқыланғанын айтты.

«Бірқатар кездесулер өткізіп, бұл мәселені талқыладық. Қала тұрғындары бұл бастаманы қолдады. Жаңа жұмыс кестесі уақытты тиімді басқаруға және жұмыс пен жеке өмір арасындағы тепе-теңдікті сақтауға көмектеседі деп ойлаймын» - деді қала әкімінің орынбасары.

Жалпы, жаңа жұмыс тәртібі қала тұрғындары арасында оң көзқарас тудырды. Бұл өзгеріс еңбек пен жеке уақыт арасындағы үйлесімділікті жақсартып, жұмыс тиімділігін арттыруға ықпал етеді.

Бұған дейін хабарлағанымыздай, өңірдің 11 ауданы да жұмыс режимін өзгертті. Бұл қатарға енді Риддер де қосылып отыр.