ШҚО-да 11 аудан жұмысты сегізде бастайды. Енді Өскемен қалды

Ең бірінші Катонқарағай ауданының халқы жаңа жұмыс режиміне ауысты. Кейінірек бұл қатарға Зайсан, Тарбағатай, Ұлан, Күршім, Глубокое, Шемонаиха, Марқакөл, Самар, Үлкен Нарын және Алтай қосылды. Енді 11 ауданда мемлекеттік мекемелер, кәсіпорындар мен әлеуметтік мекеме қызметкерлері жұмысты сегізде бастайды, деп хабарлайды Bizdiң Өskemen.

Түскі үзіліс – 12:00 мен 13:30 аралығы. 17:30 жұмыс уақыты аяқталады.

Бірақ білім беру мекемелері, балабақшалар мен медициналық ұйымдар бұрынғы режим бойынша жұмыс істей береді.

Мамандардың айтуынша, жаңа кесте еңбек өнімділігін арттыруға және тұрғындардың өмір сүру сапасын жақсартуға, уақытты ұтымды пайдалануға мүмкіндік береді.

Жаңа кестеге соңғы болып ауысқан ауданның бірі – Глубокое. Аудан әкімі Эльдар Тұмашинов бұл өзгеріс халық үшін маңызды екенін айтты.

– Біз әріптестерімізге қолдау көрсетіп, олардың отбасында, туыс-туған арасында көбірек уақыт өткізуі үшін жағдай жасаймыз. Біз халықпен кездесіп, мұндай жұмыс кестесі аудандағы өмір сүру және еңбек жағдайларын жақсартуға көмектеседі деген ортақ шешімге келдік, - дейді Эльдар Тұмашинов.