Өскеменде «Абайдың Тоғжаны» деген байқау өтті

Бұл байқауды А.С.Пушкин атындағы облыстық кітапхана мамандары ұлы ойшылдың 180 жылдық мерейтойы қарсаңында ұйымдастырып отыр. Жоғары сынып оқушылары мен студентер қатысқан іс-шара сұлулық ғана емес, ақыл-ой мен өнердің жарысы болды.

Байқау «Әсемпаз болма әрнеге», «Өнерге әркімнің-ақ бар таласы», «Жасымда ғылым бар деп ескермедім», «Қақтаған ақ күмістей кең маңдайлы» деген бөлімдерден тұрды.

Қатысушыларға «Үш қыздың анасы», «Қызыма хат» кітаптарының авторы, «Нұр Сана» білім беру орталығын және «Ханшайымдар академиясын» құрған, «Қазақ аналары – дәстүрге жол» республикалық қоғамдық бірлестігінің өңірлік филиалының төрайымы Нұрия Темірханова, Мәдениет саласының үздігі, әнші, актриса Шолпан Лақаева және С.Аманжолов атындағы Шығыс Қазақстан университетінің оқытушысы  Мархабат Байғабылова баға берді.

«Көрермен көзайымы» номинациясына «Герасимовка орта мектебінің» КММ педагог-ұйыстастырушысы Бағыдашай Мерей, «Тапқыр қыз» номинациясына Өскемендегі «№49 жалпы білім беретін мектебінің» 11 сынып оқушысы Жәнібекова Жанель, «Көрікті қыз» номинациясына Өскемендегі «№42 орта мектебінің 11 сынып оқушысы Шемпаева Рината, «Дарынды қыз» номинациясына Абай атындағы Шығыс қазақстан гуманитарлық колледжінің 1 курс студенті Абылмажинова Аяулым ие болды.

Ал Абай атындағы Шығыс Қазақстан гуманитарлық колледжінің 4 курс студенті Нұрланқызы Шұғыла 3 орынға ие болса,  Ахмер орта мектебінің 11 сынып оқушысы Ақиқатқызы Іңкәр 2 орын алды, «Қалжыр орта мектебінің» 10 сынып оқушысы Кульчарова Зарина 1 орынға лайықты деп танылса, Бас жүлдені Қазақстан Американдық Еркін университетінің 3 курс студенті Серік Іңкәр иеленді. 

Байқау жеңімпаздары ақшалай сыйлықтармен және қаламыздағы сұлулық салондарының қызметі ұсынылған сертификаттармен марапатталды.

 – «Абайдың Тоғжаны» байқауы арқылы біз Абайдың мұрасын бағалап, жастарымызды ұлттық құндылықтарға деген сүйіспеншіліктерін арттыруға ықпал жасадық деп ойлаймыз, – дейді кітапхана мамандары.