Жол жылы: ШҚО-да рекордтық көрсеткіш тіркелді

Өткен жылы аймақ басшысы Ермек Көшербаев 2024 жылды «Жол жылы» деп жариялаған. Биыл облыс бойынша 600 шақырым жол жөнделіп, рекордтық көрсеткіш тіркелді, деп хабарлайды Bizdiң Өskemen тілшісі.

– Жолдарды жөндеу кезінде экономикалық негіз ғана емес, өңір тұрғындары мен жүргізушілердің ұсыныс-пікірі ескерілді.  Облыста туристік орындарға апаратын тасжолдарды жөндеуге және қайта жаңартуға ерекше көңіл бөлінді, – деді облыс әкімі Ермек Көшербаев өңірлік коммуникациялар қызметі алаңында өткен брифингте.

Жол жылында елдімекендер де назардан тыс қалған жоқ. Биыл алғаш рет 79 шағын ауылда 120 шақырым орталық көшеге кезең-кезеңімен асфальт төсеп, көшелерді жарықтандыру жоспарланып отыр. 

Сонымен қатар облыс аумағы арқылы өтетін республикалық маңызы бар тасжолдарға ауқымды жөндеу жұмыстары жүргізілді. 2024-2025 жылдар аралығында барлығы 392 шақырым жолды жөндеу жоспарланған. Аталған жобаларды іске асыру нәтижесінде республикалық маңызы бар жолдардың барлық учаскелерінің жағдайы жақсартылады. 

Сондай-ақ 2025 жылы аймақтағы ұзақ мерзімді ірі құрылыс нысандарының бірі – Өскемен-Рахман қайнары тасжолын аяқтау жоспарлануда. Бұл жол үш ауданды байланыстырып, Қазақстанның туристік орындар қатарына жататын Катонқарағай ауданына апарады.

Жол мәселесіне келгенде Шығыс Қазақстандағы ең ірі көлік-логистикалық жобалардың бірі – Бұқтырма су қоймасы арқылы өтетін көпір құрылысының аяқталуы ірі жетістік болғанын айта кеткен жөн. Бұл өткел бірден алты ауданды байланыстырып, тұрғындардың климаттық жағдайлар мен паром өткеліне тәуелділігін жойды.