Биыл ШҚО-да көкжөтел ауруының 117 жағдайы тіркелді

Шығыс Қазақстан облысында биыл көкжөтелдің расталған 117 жағдайы тіркелді, бұл 100 мың тұрғынға шаққанда 15,9 қарқындық көрсеткішін құрайды. Бұл туралы Өңірлік коммуникациялар қызметі өткен баспасөз мәслихатында ШҚО санитарлық-эпидимиологиялық бақылау департаменті басшысының орынбасары Сәуле Слямғазина мәлімдеді. 

Көкжетел - бұл бактериялық инфекция, әсіресе балалар арасында жиі кездесетін ауру. Бұл ауруды Bordetella pertussis бактериясы тудырады, ол тыныс алу жолдарына әсер етіп, ұзақ әрі қатты жөтелге әкеледі.

ШҚО-да аурушаңдықтың географиялық таралуы: Өскемен қаласы - 94 жағдай, Ұлан ауданы - 9, Глубокое ауданы - 4, Зайсан ауданы - 3, Тарбағатай және Шемонаиха аудандары - 2 жағдайдан, Риддер қаласы, Күршім және Алтай аудандары - 1 жағдайдан.

Жас ерекшелігі бойынша аурушаңдық: 1 жасқа дейінгі балалар - 39 жағдай, 1-5 жас аралығындағы балалар - 68, 6-9 жас аралығы - 8, 19 жас және одан жоғары - 2 жағдай.

Екпе алмаған балалардың жалпы саны - 93, оның ішінде: екпе егу жасына жетпеген - 9, медициналық қарсы көрсетілімдер бойынша - 28, екпеден бас тартқандар - 47, екпені өткізіп алғандар - 9. 

2023 жылы облыста көкжетелдің 3 расталған жағдайы тіркелген болатын (қарқындық көрсеткіші - 0,4), оның барлығы 14 жасқа дейінгі балалар арасында анықталған. 

Иммундау нәтижелері 2024 жылдың 10 айының қорытындысы:

1 жасқа дейінгі балалар арасында (АКДС3+Hib3) - 83,7% (6465 бала); 

1 жасқа толған балалар арасында (АКДС4+Hib4) - 44,5% (7338 бала); 

6 жастағы балалар арасында (АбКДС) - 80,6%.

Облыстағы балалардың басым бөлігі қажетті екпелермен қамтылған. Эпидемиологиялық жағдайдың тұрақтануы мақсатында профилактикалық екпелерді уақытылы алу қажеттілігі туралы акпараттық-түсіндіру жұмыстары жалғасып жатыр.