ШҚО-да волонтерлер слеті өтеді

Облыс орталығында волонтерлер слеті өтеді, деп хабарлайды Bizdiң Өskemen тілшісі.

«Ашық жүрек» деп аталатын іс-шараны Шығыс Қазақстан облысының білім басқармасы мен «Өскемен көпсалалы технология колледжі» КММ бірлесіп ұйымдастырмақ. 

"Слеттің мақсаты – волонтерліктің үздік тәжірибелермен алмасу бойынша диалог алаңын ұйымдастыру, ең белсенді волонтерлік ұйымдарды, жасақ басшыларын, волонтерлерді анықтау және көтермелеу. Сонымен қатар студенттер мен волонтерлік бірлестік басшыларының әдістемелік сауаттылығын арттыру да іс-шараның негізгі мақсаты", - дейді ұйымдастырушылар.

Облыстық волонтерлер слеті бейінді ұйымдар арасында тәжірибе алмасу үшін жағдай жасап ғана қоймай, еріктілер қозғалысына қатысамын деген жастардың мотивациясын арттыра түспек. Осылайша, еріктілер қозғалысына қоғамның назарын аударып, игі істі кең насихаттайды.

Слет барысында «Жемқорлыққа қарсы волонтерлік» диалогтық-білім беру алаңы, «Алғашқы медициналық көмек көрсету мастер-классы» білім беру алаңы; «Командалық іс-әрекет» білім беру алаңы, әлеуметтік-психологиялық тренинг түрінде, «Волонтерлік жұмыс барысында» диалогтық-білім беру алаңы жұмыс жасайды.

Еріктілер слеті 6 желтоқсан  күні сағат 10.00-де Өскемен қаласы Лермонтов  көшесі, 50 мекенжайында өтеді.