Риддер жылу электр орталығында 5 қазандық агрегатын жөндеу жұмыстары аяқталды

Риддер ЖЭО Қазақстан бойынша "қызыл аймаққа" жататын 19 жылу көзінің тізіміне енген болатын. Осындай жылу орталықтарын шұғыл жаңғыртуды биылғы жылдың ақпан айында өткен кеңейтілген отырыста Президент Қасым-Жомарт Тоқаев Үкіметке міндеттеген еді. Мемлекет басшысының тапсырмасы бойынша Риддердегі жылу электр орталығындағы кешенді жөндеу жұмыстарына республикалық бюджеттен 8 млрд теңге бөлінді. 

ШҚО энергетика және ТҮКШ басқармасының мәліметінше, қазіргі уақытта 5 қазандық агрегатын жөндеу жұмыстары аяқталды. 

– 4 қазандық агрегаты іске қосылып тұр. Олар № 1, 2, 3, 6 қазандықтар. № 4 қазандық агрегатында іске қосу-жөндеу жұмыстары жүргізіліп жатыр. №5 қазандық жұмыстары аяқталу сатысында, аяқталғаннан кейін резервке ауыстырылады. Жылу желілері бойынша жөндеу жұмыстары толығымен аяқталды. Риддер қаласында жылыту маусымы алдын ала басталды, жылумен жабдықтау температуралық кестеге сәйкес жүзеге асырылып жатыр, - делінген хабарламада.