Қытайда өтетін Қысқы Азия ойындарына шығыстан 23 спортшы қатысады

ШҚО спортшылары 2025 жылғы Қысқы Азия ойындарына дайындалуда

Алдағы жылы Харбинде өтетін IX Қысқы Азия ойындарына ШҚО-ның 23 спортшысы ұлттық  құрамада дайындалуда. Бүгінгі күні олар ресми түрдегі халықаралық және республикалық спорттық іс-шараларға қатысуда. Бұл туралы ШҚО Дене шынықтыру  және спорт басқармасының жоғары жетістіктер және спорт резерві  бөлімінің жетекшісі Аида Жуханова ШҚО Өңірлік коммуникациялар қызметі  алаңында мәлімдеді. 

- Бұл ойындар 2026 жылы Милан мен Кортина-д’Ампеццода (Италия) өтетін XXV Қысқы Олимпиада ойындарына дайындықтың маңызды кезеңі екенін ескеру керек, - деді Аида Жуханова. 

2023 жылы ШҚО-да спортпен айналысатын халықтың үлесі 42%-ға, яғни 305 989 адамға өсті. Осы саладағы жұмыстарды жақсарту  үшін облыста Дене шынықтыруды дамыту орталығы ашылды. Оның негізгі міндеті – барлық жастағы топтар, соның ішінде мектеп оқушылары, студенттер, еңбек ұжымдары және тіпті зейнеткерлер үшін жарыстар ұйымдастыру.

Аида Жуханованың айтуынша, 2023 жылы өңір  спортшылары 4359 медаль жеңіп алды,  оның ішінде 1567 алтын, 1404 күміс, 1388 қола медаль бар. Облыс құрамынан 735 спортшыдан құралған ұлттық құрама команда халықаралық және республикалық жарыстарға белсенді қатысуда.

ШҚО-да 1687 спорт нысаны бар, оның 1116-сы ауылдық жерлерде орналасқан. Қазіргі уақытта 5,5 миллиард теңге көлеміндегі 10 нысанның құрылысы жүргізілуде, оның ішінде 6 дене шынықтыру-сауықтыру кешені, шаңғы роллер трассасы, тау шаңғысы базасы және спорттық модуль бар.

Ағымдағы жылдың қараша айында Тұғыл ауылында жаңа ДШСК пайдалануға берілді, ал жылдың соңына дейін Бозанбай және Таврическое ауылдарында тағы екі нысанның құрылысын аяқтау жоспарланып отыр.

Биылғы жылы өңірде 68 республикалық және 3 халықаралық турнир сәтті ұйымдастырылды. Олардың арасында дәстүрлі "Шығыс Салбурыны" фестивалі, Халықаралық шахмат турниры және Олимпиада чемпионы Ольга Рыпакованың жүлдесіне арналған Халықаралық турнирін ерекше атап өтуге болады.