“Баламыз мектептен түнде қайтады” Өскемен халқы сабақ кестесін өзгертуді сұрайды

Үкімет қаулысына сәйкес, 1 наурыз сағат 00:00-ден бастап Қазақстанда бірыңғай сағаттық белдеу (UTC+5) белгіленді. Жергілікті уақыт 1 сағат кейінге шегерілгендіктен қазірдің өзінде күздің күні шығыста кешкі сағат төрттен кете күн қараңғы бола бастайды. Қыс мезгілінде Өскеменде UTC +5 бойынша желтоқсан айында 05:28-ден кете таң атса, түскі сағат 15:36-да күн батады. Екінші ауысымда оқитын мектеп оқушыларының ата-аналары балаларының сабақтан қараңғыда қайтатынына алаңдаулы. 

4 қарашадан бастап 2024-2025 жылдың оқу жылының II тоқсаны басталады. 2 аусымда оқитын мектеп оқушыларының жаңа тоқсанда сабақ кестесі өзгере ме, әлде сол қалпы өзгеріссіз қала ма? Осы сауалдарға Bizdiң Өskemen тілшісі жауап іздеп көрді.    

Ата-аналар күннің ерте батуы мектептен кеш қайтатын оқушыларға ыңғайсыз екенін айтады. 

– №35 орта мектепте оқитын 5 сыныптағы үлкен қызымның сабағы кешкі сағат 19:00-де аяқталады, кішкентай қызым сабақтан кешкі сағат 17:00-де шығады, әкесі сабақтан алып қайтады. Уақыттың 1 сағат алдыға шегерілгені бізге ыңғайсыз, сағат кешкі төрттен кейін қараңғы батып кетеді, балаларымыз сабақтан жай қайтады, - дейді Өскемен қаласының тұрғыны Назым Серікова.   

Екінші ауысымда білім алатын кейбір оқушылар кешкі сағат 7-ден кейін сабақтан қайтуға мәжбүр. 

– № 45 бейімделген орта мектепте 7 сыныпта оқитын баламның  сабағы 14:00-де басталады, кешкісін сабақтан 19:15-те шығады, бұрынғы уақытпен бұл 20:15, негізінен уақыттың қайтарылғаны дұрыс. Кешке жақын өте қараңғы, - деді қала тұрғыны Мадина Матай.   

Өскемен қаласында қыс мезгілінде күннің ерте батуына байланысты кестелерді өзгертіп, сабақты ерте бастайтын мектептер бар ма? деген сауалға Өскемен білім бөлімінің басшысы Сәуле Алагөзова жауап берді.  

– Әр мектеп сабақ кестесін кабинеттерінің босауына және мұғалімдердің үлгеруіне байланысты қояды. Сонымен қатар санитарлық нормалар да бар, үзілістер немесе сабақ ұзақтығын қысқарта алмайды, - дейді Сәуле Алагөзова. 

Білім басшылығының сөзінше, алдағы уақытта сабақ кестесіне ешқандай өзгертулер енгізілмейді. Екінші ауысымда оқитын мектеп оқушылары қыс мезгілінде үйлеріне күн батысымен бірақ қайтуға мәжбүр.

Ақмарал Мұхтарбекова