Аманжолов университетінде Наурыз тойы болады

Сәрсен Аманжолов атындағы Шығыс Қазақстан университеті жыл сайын Наурыз мейрамын ерекше тойлауды дәстүрге айналдырған. Белгілі білім ордасының ұжымы мен студенттері биыл да “сәуір болмай тәуір болмас” деген ұстанымнан жаздай жер аяғы кеңіген уақытта Ұлыс күнін дүркірете атап өтпек.

Іс-шара 4 сәуір күні сағат 12:00-де №1 оқу ғимаратының маңында өтеді. Көктемгі мереке қонақтарын ауқымды көрмелер, ұлттық нақыштағы театрландырылған қойылымдар, қолөнер жәрмеңкесі және басқа да қызықты шаралар күтеді.

“Наурыз мейрамының ерекше сәні – кез келген адам өз бағын сынап көре алатын садақ атудан және асық атудан өтетін жарыстар болмақ. Көшпелі халықтың тарихында садақ пен жебе – тек негізгі қарудың бірі ғана емес, сонымен қатар ойын-сауықтың, спорттың және терең философияның нышаны”, - дейді ұйымдастырушылар.

Университет алдында жеті ақ боз киіз үйден тұратын «Ұлы көш» болады. Қонақтар Абай Құнанбаев, Қасым Қайсенов, Төлеген Тоқтаров, Ізғұтты Айтықов, Қаныш Сәтбаев, Сәрсен Аманжолов, Қанипа Бітібаева есімдері ұлықталған қазақ үйлерінің ұлттық көрінісімен таныса алады.

Бұдан кейін ұлттық ойындар өтеді: арқан тарту, қазақ күресі, тоғызқұмалақ, жекпе-жек.

Қатысушылардың мерекелік көңіл-күйін вокалды-аспаптық қойылымдар, әсем би нөмірлері және сахналық көріністер жандандырады. Наурыз мерекесінің соңы университет студенттері үшін арнайы ұйымдастырылған мерекелік дискотекамен түйінделеді.