Мопедті тіркеп үлгеру керек

Ішкі істер министрлігі мопедтерді шұғыл тіркеу қажет екенін ескертті. Бұған екі апта уақыт қалды. 

Заң бойынша 5 сәуірден кейін тіркелмеген мопедті жүргізуге тыйым салынады. Жүргізгендер Әкімшілік кодекске сәйкес жауапкершілікке тартылады.

Қазір республика бойынша 8527 мопед тіркелген. Оны тіркеу үшін тұрғылықты жері бойынша арнайы халыққа қызмет көрсету орталығына жүгіну қажет. Өзіңізбен бірге мына құжаттар болу керек: жеке басты куәландыратын құжат, электронды түрі де жарайды, техникалық құжат немесе мопедтің техникалық сипаттамалары туралы мәліметтер. Өтінішті толтырып, мопедті тексеруден өткізіп, көлік құралын тіркеу, тіркеу туралы куәлік және мемлекеттік нөмір алу үшін мемлекеттік баждарды төлеу қажет.