Ұлан ауданының экономикасында өсім байқалады

ЖАҢАЛЫҚТАР / АУДАНДАР 12-12-2024, 23:30 0

Ұлан ауданында жүргізіліп жатқан әлеуметтік-экономикалық өзгерістер мен жетістіктер ауданның дамуында жаңа кезеңнің басталғанын көрсетеді. Мемлекет саясаты Президенттің Жолдауы мен облыс әкімінің тапсырмаларын жүзеге асыруға бағытталған. Бұл жұмыстардың нәтижесінде ауданның өндіріс, ауыл шаруашылығы, инвестициялар тарту және құрылыс салаларындағы көрсеткіштері айтарлықтай жақсарды. Осы жетістіктерге Ұлан ауданының әкімі Арман Бекбосынов егжей-тегжейлі тоқталды.

Ауданның экономикасы әртараптанып, барлық салаларда өсім байқалады. Өнеркәсіп және ауыл шаруашылығы өндірісі артқанымен қатар, инвестициялар тарту, құрылыс жұмыстары және кәсіпкерліктің дамуы ауданның тұрақты дамуын қамтамасыз етіп отыр. Ірі қара мал мен ауыл шаруашылығы өнімдерінің көлемі де ұлғайып, егіншілікте жақсы нәтижелер көрсетілуде. Осылайша, ауданның әлеуметтік-экономикалық жағдайы жақсарып, тұрғындардың өмір сүру сапасын арттыру үшін барлық мүмкіндіктер жасалып отыр. Аудан әкімінің халықпен өткен кездесуінде аталған жетістіктерге ерекше назар аударылды.

– Өнеркәсіп саласындағы жетістіктер айқын байқалады. Аудан бойынша өндірілген өнімнің көлемі 55,5 миллиард теңгеге жетіп, өсу қарқыны 111,1%-ды құрады. Өңдеуші өнеркәсіптің көлемі 49,4 миллиард теңгені құрап, 109,4%-ға артты. Бұл көрсеткіштер өндіріс көлемінің ұлғаюы мен өңдеуші өнеркәсіптің дамуын көрсетеді. Ауыл шаруашылығында да өсім байқалады. Ауданда ауыл шаруашылығының жалпы өнімі 70,7 миллиард теңгені құрап, 109,1%-ға өсті. Бұл, өз кезегінде, ауыл шаруашылығының одан әрі дамуы үшін негіз болып табылады, – деді аудан әкімі Арман Бекбосынов.