Жерлестері жеңімпаздарды салтанатпен қарсы алды – ШҚО

ЖАҢАЛЫҚТАР 6-12-2024, 16:02 0

3 желтоқсан күні Астана қаласында өткен «Тең мүмкіндіктер» спорт фестивалінде Шығыс Қазақстан облысының намысын қорғаған «Қайсар» командасы жеңіл атлетика бойынша бірінші орын алып, жеңіс тұғырынан көрінді, деп хабарлайды Bizdiң Өskemen тілшісі.
Естеріңізге сала кетейік, 21 қараша күні ШҚО-да «AMANAT» партиясының «Кедергісіз келешек» партиялық жобасы аясында «Тең мүмкіндіктер» спорт фестивалі ұйымдастырылған. Нәтижесінде Глубокое ауданы Белоусовка орта мектебінің оқушыларынан құралған «Қайсар» командасы жеңіске жетіп, республикалық кезеңге жолдама алды.

- Биыл алғаш рет өткізіліп отырған фестиваль жоғары деңгейде өтті. Біздің балаларымыз 14-15 жас аралығындағы санатта 50, 100, 200 метрге жүгіруден жақсы нәтиже көрсетіп, жеңіске жетті. Спорттық сайыстан бөлек, Астананың көрікті жерлерін аралауға да мүмкіндік туды, - дейді №1 Белоусовка орта мектебінің дене шынықтыру пәні мұғалімі Сержан Тұяқбаев.

Бұл фестиваль ерекше қажеттіліктері бар балаларды қолдауға бағытталған «Кедергісіз келешек» партиялық жобасы аясында өткізілді. Жоба қоғамда тең мүмкіндіктерді насихаттап, инклюзивтілік қағидаттарын нығайтуға зор үлес қосуда. Жарыс жеңімпаздарын жақындары мен «AMANAT» партиясының өкілдері салтанатты түрде күтіп алды.

- «Қайсар» командасы тек жеңіс әкеліп қана қоймай, облыстың спорттық деңгейінің жоғары екенін тағы бір мәрте дәлелдеді. Олардың бұл жетістігі басқа жас спортшыларға шабыт беріп, жаңа биіктерге ұмтылуға серпін болмақ. «Қайсар» командасын тағы да жеңістерімен шын жүректен құттықтаймын! Алдағы уақытта да биіктерден көрініп, спорттық жетістіктеріңіз еселене берсін деген тілегімді жеткізгім келеді,- деді «AMANAT» партиясы ШҚО филиалының төрағасы Сайрангул Жумадилова.