ШҚО-да “Супер ЦОН” салынып жатыр

ЖАҢАЛЫҚТАР 3-12-2024, 10:19 0

Қазіргі күні облыс орталығында азаматтарға ыңғайлы және сапалы қызмет көрсетуге арналған бірегей халыққа қызмет көрсету орталығы (ХҚКО) салынып жатыр. Шығыс Қазақстан облысының әкімі Ермек Көшербаев өңірде жүзеге асырылып жатқан ірі жобалардың бірі “Супер ЦОНның” құрылыс барысымен танысты, деп хабарлайды Bizdiң Өskemen тілшісі.
«Супер ЦОНда» барлық мемлекеттік органдардың қабылдау бөлмелері, open әкімдік, құқық қорғау органдарының орталығы, бизнесті дамыту жөніндегі блок орналасады. Жобаның басты мақсаты - аймақтағы мемлекеттік және басқа да қызмет көрсету мекемелерін бір жерге шоғырландырып, тұрғындар үшін қолайлы жағдай жасау.

- Қазір орталықтың құрылыс жұмысы кестеге сәйкес жүргізіліп жатыр. Бұл - тұрғындар мемлекеттік және әлеуметтік қызметтерді ала алатын бірыңғай цифрлық фронт-офис болады. Жобаның толықтай сапалы орындалуы қадағалануы керек, - деді аймақ басшысы Ермек Беделбайұлы.

Сондай-ақ облыс әкімі халық көп жиналатын орталықтың автотұрақ мәселесіне де баса назар аударуды тапсырды.

- Ақылы және ақысыз тұрақтар болуын қадағалап, кәсіпкерлермен бірлесе шешкен жөн, - деп атап өтті ол.

Естеріңізге сала кетейік, «Супер ЦОН» Жібек жолы көшесінің бойындағы “Алтай” көтерме-тарату орталығының аумағында орналасқан.