Елімізде дене салмағы өте төмен балалардың өмір сүру деңгейі 4 есе өсті

17 қарашада бүкіл әлемде 2009 жылы Еуропалық жаңа туған нәрестелерге күтім жасау қоры (EFCNI) құрған шала туған нәрестелер күні атап өтіледі.

Денсаулық сақтау министрлігінің мәліметінше, Қазақстанда жыл сайын 20-22 мың бала мерзімінен бұрын туады, бұл барлық жаңа туған балалардың шамамен 5%-ын құрайды. Жүктілігі 36 аптадан аз және салмағы 2500 грамнан кем туған бұл балалар ерекше күтімді қажет етеді. 

– Қазақстанда қазіргі заманғы тиімді перинаталдық технологиялар дене салмағы 500 грамнан және салмағы 1000 грамнан төмен жаңа туған нәрестелерге сәтті күтім жасауға мүмкіндік береді, - делінген Денсаулық сақтау министрлігінің хабарламасында.  

Соңғы 15 жылдың ішінде нәресте өлімінің көрсеткіші 3 есе, неонаталдық өлім 3,3 есе төмендеді, ал дене салмағы өте төмен балалардың өмір сүру деңгейі 4 есе өсті.

–  Бұл нәтижелер Орталық Азия елдерінің арасында үздік нәтижелердің бірі, - дейді министрліктегілер.