Ерлік пен борышқа адалдық жолы

Шығыс Қазақстан облысы Төтенше жағдайлар департаменті №8 өрт сөндіру бөлімінің аға өрт сөндіруші-құтқарушысы Сәкен Өтеев Төтенше жағдайлар министрлігінің қатарында 12 жылдан астам уақыт бойы абыроймен қызмет етіп келеді. Ол табиғи өрттерді, тұрғын үй секторындағы және Өскемен қаласындағы ірі нысандардағы өрттерді сөндіруге бірнеше рет қатысты.

ШҚО ТЖД баспасөз қызметінің мәліметінше, 2024 жылы кондитерлік өнімдер қоймасында көлемі 200 тонна өнімді қамтыған ірі өрт орын алды. Өрттің қарқыны өте жоғары болып, Сәкен Өтеев пен оның әріптестеріне жалынды ауыздықтап, оның одан әрі таралуына жол бермеуге тура келді.

Өрт сөндірушілер қою түтін мен жоғары температура жағдайында жұмыс істеп, орасан зор қысыммен берілетін өрт сөндіру жеңдерін ұстап, тілсіз жаумен арпалысты. Соның нәтижесінде өрт 1500 шаршы метр аумақта ауыздықталды.

Сәкеннің кәсіби шеберлігінің, төзімділігі мен өз ісіне деген адалдығының айқын дәлелі – оның төтенше жағдайға тап болған адамдарға бірнеше рет көмекке келуі. 2025 жылы Сәкен Өтеев Назарбаев даңғылындағы бес қабатты көппәтерлі тұрғын үйде болған өртті сөндіруге қатысты. Өрт сөндірушілердің үйлесімді іс-қимылы мен кәсібилігінің арқасында өрт толығымен жойылып, 45 адам, оның ішінде 7 бала эвакуацияланды.

Әріптестері Сәкен Өтеевті әрдайым сенім артуға болатын, қиын сәтте жанынан табылатын сенімді жолдас әрі білікті маман ретінде бағалайды.

Өрт сөндіруші Сәкен Өтеевтің сүйікті хоббиі – балық аулау және спортпен шұғылдану. Ол дзюдодан спорт шеберлігіне кандидат.