Елімізде есірткі қылмысы тиылмай тұр

Елімізде төрт айда үш мыңға жуық есірткі құқық бұзушылығы анықталған. Оның ішінде 828 сату фактісі бар. Заңсыз айналымнан шамамен 3,5 тонна есірткі тәркіленген. Оның 259 кг-ы синтетика, екі тоннаға жуығы марихуана, 303 кг-ы гашиш. Сондай-ақ, 83 есірткі зертханасы жойылған. 

Алты тоннаға жуық прекурсор тәркіленген. 20 ұйымдасқан қылмыстық топтың жолы кесіліп, заңсыз контенті бар 11 мыңнан астам сайт, сондай-ақ 1 млрд теңгеден астам сомаға 12 мың банк картасы мен шот бұғатталған. 1783 адам ұсталып, оның 669-ы қамауға алынған.

ІІМ есірткі қылмысына қарсы іс-қимыл комитеті төрағасының міндетін атқарушы Данияр Мейірханның сөзінше, сәуір айында бірқатар сәтті операция жүргізілген. Қосшы қаласында Ақмола облысының тумасы ұсталған. Оның автокөлігінен 6,5 кг a-рvр синтетикалық есірткісі тәркіленген. Одан кейін жүргізілген іс-шаралар барысында басқа да күдіктілер – Солтүстік Қазақстан облысының тұрғындары ұсталған. Олардан тағы бір килограмм синтетика тәркіленсе, Астана қаласында Ақтөбе тұрғыны ұсталып, одан 2,5 кг синтетикалық есірткі тәркіленген. 

– Барлық күдікті уақытша ұстау изоляторына қамалды. Бұл бағыттағы жұмыс жалғасуда, – деді Данияр Мейірхан.

Бұған дейін ҰҚК қызметкерлері 2,4 миллион доллар табыспен халықаралық есірткі тасымалының жолын кескен болатын.