«Экологтар, шара қолданыңыздар!» Өскемендегі зауытта не болып жатыр?

видеодан алынған кадр

Өскемен тұрғыны әлеуметтік желіде бейнежазба жариялап, дабыл қақты. Бейнежазбада Согра ауданында орналасқан титан-магний комбинаты көрсетілген, зауыт аумағында көк түтін үздіксіз будақтап жатыр. «Экологтар, шара қолданыңыздар!» деп мәселе көтерді қала тұрғыны. 

Өскемендіктер желіде «ТМК-да апатты жағдай болып, соның салдарынан зиянды қалдықтар шығарылып жатыр» деген болжам айтқан.

Осыдан кейін облыстық экология департаментінің өкілдері зауыт орналасқан ауданға барып, тексеру жүргізді. Бірақ олар ауадағы ластаушы заттар шекті нормадан асып кеткен жоқ деп мәлімдеді. Сондай-ақ ешқандай апатты жағдай болмағанын айтады.

«25 наурызда сағат 11:30 шамасында әлеуметтік желілерде «Өскемен титан-магний комбинаты» АҚ аумағында авариялық жағдайда қалдықтар шығарылып жатуы мүмкін делінген бейнежазба тарады. Мамандар дереу аталған жерге барып, аспаппен ауа сапасын тексерді. Өлшеу нәтижелері бойынша ластаушы заттардың шекті рұқсат етілген концентрациясының (ШРК) асып кету дерегі тіркелген жоқ. Алайда ауа-райы жағдайы, атап айтқанда желдің жылдамдығы мен бағыты шығарындылардың таралуына ықпал етуі мүмкін. Бұл жағдай өлшеу нәтижесіне де әсер етеді», - деп мәлімдеді департамент.