Төтенше жағдай вице-министрі шығысқа не үшін келді?

ҚР Төтенше жағдайлар вице-министрі Кеген Тұрсынбаев шығысқа жұмыс сапарымен келді. Сапар аясында ол Өскеменде орналасқан ҚР ТЖМ екінші құтқару батальонында болып, құтқарушылар мен әскери қызметшілердің қызмет өткеру шарттарымен танысты. Ол құтқарушылар жұмыс істейтін жабдықтың техникалық жағдайына да баға беріп,  жеке құраммен ағымдағы міндеттер мен мәселелер туралы сөйлесті.

Сонымен қатар вице-министр Шығыс Қазақстан облысының Төтенше жағдайлар департаментінде жұмыс кеңесін өткізді. Іс-шараға Шығыс Қазақстан облысы әкімінің орынбасары Бақытжан Байахметов қатысты. Кездесу барысында өңірдің азаматтық қорғау қызметтерінің қысқы кезеңге дайындығына, жылыту маусымының өтуіне және сейсмикалық қауіпсіздікті қамтамасыз етуге қатысты негізгі мәселелер талқыланды. Су тасқынының алдын алуға және профилактикалық іс-шараларды уақтылы іске асыруға бағытталған шараларға ерекше назар аударылды.

Вице-министр өңірдің қауіпсіздік деңгейін арттыру үшін профилактикалық  шараларды алдын ала орындаудың маңыздылығын айтып:

«Алдын алу  іс-шараларын алдын ала іске асыру төтенше жағдайлардан қорғалу деңгейін арттыруға мүмкіндік береді. Біз апатты күтпей, оның алдын алу үшін барлық шараларды қабылдауымыз керек. Азаматтардың қауіпсіздігі - біздің басты міндетіміз», - деп ол өз сөзінде атап өтті.

Жұмыс сапары барысында вице-министр көктемгі су тасқыны кезеңінде болуы мүмкін төтенше жағдайларға дайындығын бағалау үшін облыстың су тасқыны қаупі бар аудандарына да барады.