ШҚО-да орман өртін сөндіру станциясы жетіспейді – Үкімет отырысы

Шығыс Қазақстан облысында ормандағы өрт сөндіру станциялары жетіспейді. Бұл жөнінде Экология және табиғи ресурстар министрі Ерлан Нысанбаев Үкімет отырысында айтты.

– Ақмола, Ақтөбе, Атырау, Батыс Қазақстан, Қостанай, Павлодар және Шығыс Қазақстан облыстарында ормандағы өрт сөндіру станцияларының жетіспеушілігі байқалады. Ал оның жартысы өткен ғасырдың 50-60 жылдары салынған. Облыстардың жергілікті бюджеттеріне эмиссия үшін төлемдер түскенімен олар жаңа орман өрт сөндіру станцияларын салуға бағытталмаған, – деді Ерлан Нысанбаев.

Сондай-ақ министрдің айтуынша, Шығыс Қазақстанда орман инспекторлары да тапшы.

– Былтырдан бері орман күзеті жеке құрамының жетіспеушілігі күрделі мәселе болып отыр. Шығыс Қазақстан, Ақмола және Павлодар облыстарында орман күзетiнiң штат санын нормативке дейiн жеткiзу мәселесi шешiлмеген, – деді ведомство басшысы.

Бұған дейін хабарлағанымыздай, Зайсан ауданында қамыс өртеніп жатыр. Тілсіз жаумен күреске тікұшақ та жұмылдырылған. Алайда мамандар өртті тоқтата алмай жатыр.