Марқакөлде полиция ғимараты жаңарды
Марқакөл ауданында полиция бөлімінің ғимаратына күрделі жөндеу жүргізілді. Жаңарған нысан заманауи жиһазбен және бейнебақылау жүйесімен жабдықталды. Сондай-ақ мұнда азаматтардың өтінішін қабылдайтын арнайы кеңсе де бар.
Ғимараттың ашылуына орай ұйымдастырылған іс-шараға облыстық полиция департаменті басшысының орынбасары Руфат Қажымқанов, аудан әкімі, әкімдік өкілдері, қоғам белсенділері және ішкі істер органдарының ардагерлері қатысты.
Руфат Қажымқанов жеке құрамға алғысын білдіріп, олардың қоғамдық тәртіпті қамтамасыз етудегі маңызды рөлін атап өтіп, Мемлекет басшысы мен Ішкі істер министрінің тапсырмаларын еске салып, құқықбұзушылықтың алдын алуға ерекше назар аудару керектігін айтты.
«Полиция тек қылмыстарға әрекет етумен шектелмей, оларды белсенді түрде алдын алуы қажет. Заңдылық пен қоғамдық тәртіп – қоғам сенімінің негізі. Азаматтардың мәселелерін жедел шешіп, халықпен тығыз байланыста болу маңызды», - деді ол.
Департамент басшысының орынбасары қоғамдық тәртіпті сақтауға үлес қосқан белсенді тұрғындарға алғыс хаттар мен естелік сыйлықтар табыстап, ішкі істер органдарының ардагерлеріне қызметке қосқан үлестері үшін ризашылығын білдірді.
Сондай-ақ жергілікті билік пен қоғам өкілдерімен кездесіп, қауіпсіздікті арттыру шараларын талқылады. Әсіресе, ауылдық жерлердегі өзекті мәселелердің бірі – мал ұрлығымен күреске ерекше көңіл бөлінді.
