ШҚО-да қар лезде еріп жатыр. Тасқынға қарсы жұмыс қарқынды жүргізілуде

Шығыс өңірінде тасқынының алдын алу жұмыстары жүйелі түрде жүргізілуде. Су басу қаупі бар аймақтарда тәулік бойы кезекшілік ұйымдастырылған. Жағдай жедел штаб пен өңір басшысының бақылауында.

Мұндай жұмыстар Ұлан ауданында да жүргізілуде. Мәселен, қазір Герасимовка ауылының маңындағы егістік алқаптарынан қарғын су қарқынды ағып жатыр. Су тасқынының алдын алу үшін су бұру арнасы тереңдетіліп, инертті материалдармен бекіту жұмыстары жүргізілді. Тұрғын үйлерге су кірген жоқ. Үш ауладан еріген сулар сорылды. Қазір барлық қажетті су тасқынына қарсы шаралар атқарылуда. Ауылға облыс әкімі Нұрымбет Сақтағанов барды.  Өңір басшысы айналма канал жағалауын бекіту, арықтарды тереңдету және тазалау бойынша тапсырмалар берді. Үлкен су еш кедергісіз ағуы тиіс.

– «Барлық қызметтер күшейтілген дайындық режимінде жұмыс істеп жатыр. Мерекеге қарамастан, ешкімге босаңсуға болмайды. Қажет болған жағдайда су тасқынының алдын алу және аумақты қорғау үшін қосымша техника тартылады. Бұл күндері облыс тұрғындары алаңсыз Наурыз мерекесін тойлауы керек. Ал біз олардың қауіпсіздігі үшін барлық қажетті жағдайды жасаймыз», – деді Нұрымбет Сақтағанов.

Тарбағатай ауданында су тасқыны қаупі бар аймақтар, соның ішінде Маңырақ тауының күнгей беті, Қара Тоғам, Есенгелді және Барғана өңірлері тексерілді.

Алтай ауданында өзендердің мұз қатпарлары бұзылуда. Ауа райы мен су деңгейі сағат сайын бақыланып, жағдай қатаң бақылауда. Үлкен Нарын ауылындағы Алтайэнерго көшесінде шаруашылық құрылысының жанында еріген судың жиналуы байқалды. Алайда тұрғын үйге қауіп жоқ, өйткені жақын маңда дамба орналасқан, ал су айналма каналға ағызылуда. Қазіргі уақытта канал тазартылып, су біртіндеп кетуде. Төтенше жағдайлар қызметі мен жергілікті атқарушы органдар жағдайды қадағалап отыр. Қорғау құрылыстарын дайындау және нығайту үшін барлық қажетті шаралар қабылданды. Инертті материалдар мен арнайы техника дайын.