Өскеменде Наурызға орай 300-ге жуық іс-шара өтті

Наурыз мейрамының басты мерекелік орны облыс орталығындағы Республика алаңы болды. Мұнда 15 киіз үйден тұратын киіз үй қалашығы құрылып, мерекелік думанның орталығына айналды. Әрбір киіз үй қазақ халқының мәдениеті, тұрмысы мен тарихын бейнелейтін жеке тақырыпқа арналды.

ШҚО әкімі Нұрымбет Сақтағанов барлық киіз үйлерді аралап, дәстүрлі қазақ қолөнерін, ұлттық салт-дәстүрлерді тамашалап, шеберлермен әңгімелесті.

Қазақстандағы ең үлкен 500 адамдық киіз үй қала тұрғындары мен қонақтарының ерекше назарын аударды. Бұл киіз үйдің ішінде бірнеше ірі мәдени шаралар, халықтық қойылымдар мен көрмелер ұйымдастырылды.

Киіз үйлер байқауында С.Аманжолов атындағы Шығыс Қазақстан университеті бас жүлдені иеленді. Жалпы, бұл күні облыс бойынша 120 мерекелік киіз үй тігілді.

Мерекелік шара аясында Өскеменде ұлттық спорт түрлерінен жарыстар өтіп, оған кәсіпқой спортшылар да, әуесқойлар да қатысты. Бағдарламада қазақ күресі, арқан тарту, асық ату, қол күресі, бағанаға өрмелеу, өгіз көтеру, таяқ тартыс, гір көтеру, ләңгі ату және жастықпен атыс сынды ұлттық ойындар болды.

Сонымен қатар, Наурыз мейрамын тойлау аясында Өскеменде ең үздік бауырсақ байқауы өтті. "Бауырсақ-пати" шарасында 1000 бауырсақ дайындалып, мерекеге жиналған халыққа ұсынылды.

Ұйымдастырушылардың айтуынша, шараның басты мақсаты – дәстүрлі қазақ асханасын дәріптеу және ел арасында бірлік пен қуанышты атмосфера қалыптастыру.

Байқау қорытындысы бойынша Гран-при жүлдесін №50 жалпы білім беретін мектеп жеңіп алды. "Ең үлкен бауырсақ" номинациясында №30 мектеп үздік атанды. "Ең үздік шығармашылық таныстыру" аталымында №106 "Қарлығаш" балабақшасы жеңімпаз болды. Ал "Үздік тағам безендіру" номинациясында №33 Абай атындағы орта мектеп алдыңғы қатардан көрінді.

Мереке қонақтары жаңа піскен бауырсақтан дәм татып қана қоймай, дәстүрлі әндер мен билерден, халық ойындарынан тұратын концерттік бағдарламаны тамашалады.

Облыс әкімі Республика алаңындағы барлық іс-шараларға қатысып, өнер көрсеткен артистерді және жиналған жұртшылықты Наурыз мейрамымен арнайы құттықтады.

Жалпы, Наурыз мейрамы аясында Өскемен қаласының барлық шағын аудандарында 300-ге жуық мерекелік шара өткізілді. Сонымен қатар, облыс әкімі қала металлургтерін құттықтау үшін "Қазцинк" ЖШС ұйымдастырған мерекелік шараға арнайы барып, қала металлургтерін мерекемен құттықтады.