Тарбағатайда әжелер куиз ойнады

Наурыз мерекесі қарсаңында Тарбағатай ауданында дәстүрге айналған «Әжелер QUIZI» интеллектуалдық ойыны өтті. Белгілі ұстаз, мемлекеттік сыйлықтың лауреаты Қанипа Бітібаева атындағы ауыспалы кубок сарапқа салынатын білгірлер сайысы бұл ауданда осымен жетінші рет ұйымдастырылып отыр.

«Әжелер QUIZI» алғаш рет Қанипа Бітібаеваның туған ауылы – Жетіаралда өткен еді.  Бүгінде бұл ойын дәстүрлі додаға айналды.

– «Әжелер QUIZI»-нің басты мақсаты – ұрпақтар сабақтастығын жалғау, ата-баба салт-дәстүрін жаңғырту, сондай-ақ немере тәрбиесімен айналысып отырған әжелерімізге рухани демалыс сыйлау, – дейді ұйымдастырушылар.

Әр ауданнан келген 14 команда, 150 ге жуық әже мен ата тартысты ойын көрсетті. Жетіарал ауылынан келген «Хан Апа» әжелер ансамблі бас жүлдені иеленді. 

Тарбағатайдағы «Әжелер QUIZI» ұлттық киімді ұлықтайтын, дәстүрді дәріптейтін, халқымыздың бай мәдени мұрасын насихаттайтын ерекше шараға айналды.