Үкімет «Тарбағатай Мұнай» ЖШС мүддесі үшін кодекске түзету енгізуі мүмкін

Үкімет Шығыс Қазақстан облысының Зайсан ауданындағы Сарыбұлақ кен орнын игеріп отырған «Тарбағатай Мұнай» ЖШС-іне салық жеңілдіктерін беру мәселесін пысықтап жатыр. Бұл туралы Премьер-министр Олжас Бектенов Мәжіліс депутаттарының сауалына жолдаған жауапта айтты, деп хабарлады kaz.inform.kz.

- Ұлттық экономика министрлігі Сарыбұлақ кен орнын рентабельділігі төмен, тұтқырлығы жоғары, су басқан, өнімділігі аз және игерілген кен орындарының тізбесіне енгізу туралы «Тарбағатай Мұнай» ЖШС-нің өтінішін пысықтап жатыр. Қазір инвестормен бірлесіп жобаның барлық техникалық параметрлері пысықталып жатыр. Содан соң ол Экономиканы жаңғырту мәселелері жөніндегі мемлекеттік комиссияның қарауына шығарылады. Өз кезегінде, Энергетика министрлігі мен «Тарбағатай Мұнай» ЖШС жер қойнауын пайдалануға арналған келісімшартта көзделетін тиісті қарсы міндеттемелер бойынша келіссөздер жүргізіп жатыр. Сондай-ақ осы кен орнының мұнайын отандық ірі мұнай өңдеу зауыттарында («АМӨЗ» ЖШС, «ПМХЗ» ЖШС, 2 «ПКОП» ЖШС) өңдеу мүмкіндігі болмаған жағдайда инвестордың өндірілген мұнайды экспортқа беру мүмкіндігін қарастыру жоспарланып отыр, - деп жазылған жауапта.

Аталған кәсіпорынның мүддесі үшін «Жер қойнауы және жер қойнауын пайдалану туралы» кодекске түзетулер енгізілуі мүмкін.

- Энергетика министрлігі қарсы инвестициялық міндеттемелер қабылдау шартымен «Тарбағатай Мұнай» ЖШС ұсынған дайындық кезеңіндегі күрделі құрлық жобаларына жақсартылған модельдік келісімшарт механизмінің қолданылуын кеңейту бөлігінде «Жер қойнауы және жер қойнауын пайдалану туралы» кодекске түзетулерді қарастырып жатыр. Бұл түзетулерді жоғарыда аталған заң жобасына да енгізу жоспарланып отыр. Сарыбұлақ кен орнын игеру және дамыту жөніндегі барлық мәселені мүдделі мемлекеттік органдар инвестормен белсенді талқыланып жатыр, - деп жазады Премьер-министр.

Осыдан екі жыл бұрын Энергетика министрі Зайсан ауданындағы газ кеніші сарқылып қалғанын растаған еді.