Қасым Қайсенов кентінде жаңа емхана қашан ашылады?

Ұлан ауданының орталығы Қасым Қайсенов кентінде үш қабатты емхана салынып жатыр. Ғимараттың есік-терезелері орнатылып, жылу және су құбырлары тартылды. Мамандардың сөзіне сенсек, жұмыстың 70 пайызы орындалды, деп хабарлайды Bizdiң Өskemen.

Облыстық құрылыс басқармасының мәлімдеуінше, жаңа емхана мамандары бір күнде 150 адамға көмек көрсете алады. Бүгінде бұл мекемеге 29 498 тұрғын тіркелген. Үш қабатты ғимаратта кеңес беру-диагностикалық және алдын алу бөлімшелері, күндізгі стационар палаталары болады.

– Құрылыс жұмыстары жоспарға сай жүріп жатыр. Біз бұл әлеуметтік маңызы зор жобаның сапалы әрі өз мерзімінде аяқталуын қамтамасыз етуге жауаптымыз. Бүгінде ғимаратқа жылу жүйесі мен сумен жабдықтау жүйесі тартылды, терезелер мен есіктерді орнату жұмыстары жалғасуда. Сондай-ақ қабырғалар мен едендерді қаптау бойынша әрлеу жүріп жатыр. Көктемде медициналық мекеме айналасын абаттандыру басталады, – деді мердігер ұйым өкілдері.

Жаңа емхананың мүмкіндігі мол. Мұнда флюорография, рентген, маммография, эндоскопия кабинеттері, сондай-ақ медицинадағы әр сала мамандарының кабинеттері (оториноларинголог, офтальмолог, дерматолог, невропатолог, кардиолог, онколог, акушер-гинеколог, хирург, травматолог, фтизиатр, жалпы тәжірибелік дәрігерлер) болады. Сонымен қатар микробиологиялық, серологиялық және жалпы клиникалық зерттеулер жүргізілетін зертханалық диагностика бөлімі ашылады.

Басқарма ақпаратына сүйенсек, нысан 2025 жылдың қараша айына халық игілігіне беріледі.