Жоғарғы Тайынтыға жылдамдығы жоғары интернет жетті - ШҚО

Ұлан ауданының Жоғарғы Тайынты ауылы 3/4G стандартына сай мобильді интернетке қосылды.

«Beeline» сауда белгісімен танымал «Кар-Тел» ЖШС байланыс операторының базалық станциясын орнату – өңірдің цифрлық инфрақұрылымын дамыту жолындағы маңызды қадам болды.

40 метрлік биіктіктегі байланыс антеннасын орнату және электр желісін тарту жұмыстары 2024 жылдың желтоқсан айында аяқталған болатын. Бұл жобаны жүзеге асыру ШҚО Цифрландыру және архивтер басқармасы мен Ұлан ауданы әкімдігі және байланыс операторларының бірлескен жұмысының нәтижесінде мүмкін болды. Жоба облыстық бюджет есебінен қаржыландырылып, жергілікті тұрғындарға сапалы байланыс пен мобильді интернетке қол жеткізуге мүмкіндік берді.

Аталған жоба Наурыз мейрамының қарсаңында жүзеге асырылғандықтан, оның маңызы ерекше. Верхние Таинты ауылына мобильді интернеттің енгізілуі жергілікті халық үшін жаңа мүмкіндіктерге жол ашады. Байланыс сапасын жақсартып, білім беру және медицина қызметтеріне қолжетімділікті арттырып, цифрлық сауаттылық деңгейін көтеруге ықпал етеді.

Осылайша, мемлекеттік органдар мен байланыс операторларының үйлесімді жұмысының арқасында Верхние Таинты ауылы қазіргі заманғы цифрлық технологияларды пайдалану мүмкіндігіне ие болды. Бұл ауыл тұрғындарының өмір сапасын жақсартуға және өңірдің дамуына оң әсер етеді.