Өскеменнен Риддерге төте жол салынатын болды

Қазір Өскемен мен Риддерді жалғап тұрған жол 105 шақырым. Тарханка-Топиха-Черемшанка жолы салынатын болса, қос қала арасындағы қашықтық 43 шақырым қысқарады.

Облыстық жолаушылар көлігі және автомобиль жолдары басқармасының басшысы Нұржан Жұмаділов төте жолды салатын мердігер анықталды, деп мәлімдеді.

Мердігер – «Kurylys Group RK» ЖШС. Жоба бойынша екі көпір мен өткел жаңартылып, Топиха мен Черемшанка арасына тоғыз шақырым жаңа жол салынады.

– Байқау өткізіліп, мердігер анықталды. Жобаның құны – 38,6 миллиард теңге. Қазір республикалық бюджеттен қаржыландыру мәселесі пысықталып жатыр, – деді Нұржан Жұмаділов.

Жаңа Өскемен-Риддер жолы айтарлықтай төте болады. Дегенмен қазіргі республикалық маңызға ие үлкен жол он шақты елді мекенді облыс орталығымен және бір-бірімен байланыстырып тұр. Осы он шақты ауылдың халқы бір ғана – Өскемен-Риддер автобусымен қалаға қатынайтынын айта кеткен жөн.