ШҚО-да ішімдік ішкен екі жасөспірім ұсталды
Шығыс Қазақстан облысында «Түнгі қаладағы балалар» жедел профилактикалық іс-шарасының алғашқы күні 87 құқықбұзушылық анықталды, деп хабарлайды Bizdiң Өskemen.
Облыста республикалық «Түнгі қаладағы балалар» жедел профилактикалық іс-шарасы жалғасып жатыр. Рейдтік тексерістердің алғашқы күні тәртіп сақшылары ішкі істер органдарында есепте тұрған 48 жасөспірімнің тұрғылықты мекенжайын тексерді.
– Облыстың аумақтық бөлімшелері жүргізген жұмыстар нәтижесінде 87 әкімшілік құқықбұзушылық анықталды. Атап айтқанда, балаларды тәрбиелеу жөніндегі міндеттерді орындамағаны үшін 8 заңды өкіл әкімшілік жауапкершілікке тартылды, кәмелетке толмағандардың алкогольді ішімдіктер ішуі немесе масаң күйде қоғамдық орындарда жүруі бойынша – 2 құқықбұзушылық тіркелді, кәмелетке толмағандардың түнгі уақытта (сағат 23:00-ден 06:00-ге дейін) заңды өкілінсіз жүргені үшін 73 әкімшілік хаттама толтырылды, – делінген Шығыс Қазақстан облысы полиция департаментінің хабарламасында.
Айта кетейік, «Түнгі қаладағы балалар» жедел профилактикалық іс-шарасы облыс аумағында әлі де жалғасып жатыр. Полиция қызметкерлері кәмелетке толмағандардың қауіпсіздігін қамтамасыз етуге және жасөспірімдер арасындағы құқықбұзушылықтардың алдын алуға бағытталған рейдтік жұмыстар мен профилактикалық әңгімелер жүргізіп жатыр.
