ШҚО-да қайтарылған активтер есебінен 7 әлеуметтік жоба жүзеге асады

Прокуратура органдары активтерді қайтару және оларды заңды экономикалық айналымға тарту бойынша жүйелі жұмыс жүргізіп жатыр. Мемлекет басшысының тапсырмасы бойынша Үкімет 333 әлеуметтік нысанның құрылысын мақұлдады. 

Ал Шығыс Қазақстанда 7 әлеуметтік жоба жүзеге асады. Атап айтқанда, Өскемен қаласында гематология орталығы, Риддер қаласында аурухана кешені, Шемонаиха ауданының Волчанка ауылында дәрігерлік амбулатория құрылысы, Ұлан ауданының Асубұлақ кентінде, Бозанбай, Отрадное ауылдарында және Шемонаиха ауданының Үлкен Өзен ауылында коммуналдық инфрақұрылымды жаңғырту дәл осы қайтарылған активтер есебінен жүргізіледі.

Мысалы, Риддер қаласындағы қазіргі аурухана 70 жылдан астам уақыт бойы жұмыс істеп келеді. Аурухана қала тұрғындарына, қала маңындағы 8 ауылға және Глубокое ауданына қарайтын Черемшанка ауылының тұрғындарына қызмет көрсетеді.

Мекеменің корпустары қаланың әртүрлі бөліктерінде орналасқан, бұл тұрғындарға қолайсыздықтар туғызады.

Активтерді қайтару бойынша жұмыс аясында өткен жылы Арнайы мемлекеттік қордан осы аурухананың құрылысын аяқтауға қаражат бөлінді.

Құрылыс жұмыстарын ағымдағы жылдың соңына дейін аяқтау жоспарлануда.

Бұдан бөлек, Ұлан ауданының Асубұлақ кенті мен Отрадное, Бозанбай ауылдарында өңірдің 3,6 мың тұрғынын ауыз сумен қамтамасыз ету бойынша жобалар іске асырылуда.

Осы жобаларды іске асыру көпжылдық инфрақұрылымдыққ проблемаларды шешуге және азаматтардың өмір сүру сапасын жақсартуға бағытталған.