Рахман қайнарынан Сексеуілге дейін: Қазақстанда қандай автожолдар жаңартылып жатыр?
Қазақстанда 2026 жылы республикалық маңызы бар автомобиль жолдарын салу және реконструкциялау бойынша жалпы ұзындығы 3,7 мың шақырымды құрайтын 14 жоба іске асырылып жатыр, деп хабарлайды Bizdiң Өskemen.
Көлік министрлігінің мәліметінше, тамыз айында бұл тізімге тағы үш ірі жоба қосылды. Атап айтқанда, ұзындығы 800 шақырым болатын «Бейнеу – Сексеуіл», 462 шақырымдық «Қызылорда – Сексеуіл» және 312 шақырымдық «Ұлғайсын – Сексеуіл» автожолдары. Осы үш жобаның жалпы ұзындығы 1 574 шақырымды құрайды.
2026 жылы жалпы ұзындығы 69,6 шақырым болатын үш жобаны аяқтау көзделген. Олар – ұзындығы 27,7 шақырымды құрайтын Рахман қайнары жолы, 14,9 шақырымдық Петропавл – Ресей Федерациясының шекарасы автожолы және ұзындығы 27 шақырым болатын Атырау қаласының айналма жолы.
– 2027 жылы тағы үш жобаны аяқтау жоспарланып отыр. Олар – ұзындығы 208 шақырым болатын Қызылорда – Жезқазған автожолы, 28 шақырымдық Ақтөбе – Ұлғайсын учаскесі және ұзындығы 2,7 шақырымды құрайтын Ертіс өзені арқылы өтетін көпір. Бұл нысандардың жалпы ұзындығы 238,7 шақырымды құрайды. Аталған нысандардан бөлек, биыл Сарыағаш қаласының 102 шақырымдық айналма жолын салу жұмыстары, сондай-ақ 234 шақырымдық Ақтөбе – Ұлғайсын, 572 шақырымдық Қарағанды – Жезқазған учаскелерін, Қызылорда қаласының 26 шақырымдық айналма жолын және 896 шақырымдық Орталық – Батыс жолын реконструкциялау жұмыстары жалғасып жатыр, – делінген Көлік министрлігінің хабарламасында.
Барлық жобаларды іске асыру негізгі автомобиль бағыттарының өткізу қабілетін арттыруға, жол жүру уақытын қысқартуға, өңірлердің көлік қатынасын жақсартуға, қозғалыс үшін қолайлы әрі қауіпсіз жағдай жасауға, сондай-ақ жүк тасымалы мен транзиттік бағыттарды дамыту мүмкіндіктерін кеңейтуге мүмкіндік береді.
Сонымен қатар жаңа жолдардың құрылысы және қолданыстағы жолдарды реконструкциялау іргелес елді мекендердің дамуына және өңірлердегі іскерлік белсенділіктің артуына қосымша жағдай жасайды.
