«Күміс жас» жобасы: ШҚО-да заңсыз аударылған 4,6 млн теңге бюджетке қайтарылды
Алтай ауданының прокуратурасы «Күміс жас» мемлекеттік жобасын іске асыру кезінде заңнама талаптарының бұзылғанын анықтады, деп хабарлайды Bizdiң Өskemen.
«Күміс жас» жобасы 50 жастан асқан азаматтарды жұмысқа орналастыруға жәрдемдесуге бағытталған. Жоба аясында бағдарламаға қатысу мерзіміне байланысты жұмыс берушілерге жұмысқа орналастырылған азаматтардың жалақысының 60-тан 70%-ға дейінгі бөлігі бюджет қаражаты есебінен субсидияланады.
– Тексеру барысында жұмыс берушінің қызметкерлердің нақты жұмыспен қамтылуы туралы бұрмаланған мәліметтер ұсынған фактілері анықталды. Кейбір қызметкерлердің жұмыс орындарында нақты болмағанына, соның ішінде аудан аумағынан тыс жерлерге шығып кеткеніне қарамастан, жұмыс уақытын есепке алу табельдерінде толық жұмыс күндері мен сағаттары көрсетілген. Нәтижесінде мемлекеттік субсидиялар қызметкерлердің еңбек міндеттерін мәлімделген көлемде нақты орындағаны жеткілікті түрде расталмастан аударылған. Аударылған қаражаттың жалпы суммасы шамамен 4,6 млн теңгені құрады, – делінген ШҚО прокуратурасының хабарламасында.
Прокурорлық қадағалау актісі бойынша төленген субсидияларға қайта есептеу жүргізіліп, бюджет қаражаты мемлекет кірісіне толық көлемде қайтарылды.
