ШҚО-да бірнеше педагогтің жалақысы бюджетке қайтарылды
Үлкен Нарын ауданындағы мектептерде сабақты толық өткізбесе де педагогтер жалақыларын толық алып отырған.
Аптасына көзделген 19 сағат сабақтың орнына бар болғаны сегіз сағат өткізілген. Міндетті пәндердің бір бөлігі жеке жоспарларда болмаған.
Прокурорлар анықтағандай, ерекше қажеттіліктері бар балаларға жоспарланған оқу сағаттары толық өткізілмеген.
Сонымен қатар, жеке оқу жоспарларының мазмұнынан да бұзушылықтар анықталды. Оларда міндетті пәндер болмаған, ал психологиялық-медициналық-педагогикалық консультацияның ұсынымдары сақталмаған.
Сабақтардың бір бөлігін ерекше білім беру қажеттіліктері бар балаларды оқытуға тиісті арнайы даярлығы жоқ педагогтер өткізген.
Тексеру барысында кейбір мұғалімдерге іс жүзінде өткізілмеген сабақтар үшін жалақы есептелгені де анықталды.
Прокуратураның араласуынан кейін төрт баланың сапалы білім алуға деген құқықтары қалпына келтірілді.
Тексеру қорытындысы бойынша төрт мектеп директоры тәртіптік жауапкершілікке тартылды. Сонымен қатар, сегіз педагог негізсіз алған жалақыны бюджетке қайтарды.
