Ұлан ауданында экосаябақ пен этноауыл бой көтереді

Ұлан ауданында Донское ауылының маңында «Жасыл аймақ» экосаябағын құру жобасы іске асырылып жатыр және Алмасай ауылында «Тұлпар» этноауылы бой көтеруде, деп хабарлайды Bizdiң Өskemen.

– Қазіргі уақытта Ұлан ауданында туристерді орналастыратын 25 орын тіркелген. Өткен жылы аудан 14,4 мың туристі қабылдады. Туристік инфрақұрылым жүйелі түрде дамытылып, жаңартылуда. Жазда Шалқар көлінде қалалық жағажай жұмыс істейді. Биыл демалушылар үшін қолайлы әрі қауіпсіз жағдай жасау мақсатында жағажай аумағын абаттандыру жұмыстары жүргізіліп жатыр, – делінген ШҚО әкімінің баспасөз қызметінің хабарламасында.

Облыстық бюджет есебінен Донское ауылының маңында «Жасыл аймақ» экосаябағын құру жобасы іске асырылуда. Бұл үшін 20 гектар жер учаскесі бөлінді. Алмасай ауылында қазақ дәстүрлері, ұлттық мәдениет пен табиғат аясындағы демалысты үйлесімді ұштастыратын «Тұлпар» этноауылы бой көтеруде.

ШҚО әкімі Ұлан ауданының әкіміне туризм және инвестициялар басқармасымен бірлесіп туристік аймақтар мен жағажайларды кешенді түрде абаттандыру жұмыстарын жалғастыру, туристік инфрақұрылымды дамытуға және жаңа туристік өнімдерді құруға инвестициялар тарту жұмыстарын жандандыру міндеттерін қойды.